Leitarhundar

Laugardaginn 29. nóvember kl. 15:36 barst formanni beiðni um víðavangsleitarhunda á svæði 3. Leit væri að hefjast að rjúpnaskyttu sem hefði ekki skilað sér á réttum tíma í bíl samferðamanna. Frá Leitarhundum fóru Kristín með Kút, Valli sem bílstjóri fyrir Björgunarsveit Hafnarfjarðar og Teddi sem aðstoðarmaður Kristínar.

Leit hófst milli kl. 18-19 í miklu roki og svakalegum kulda. Teymi frá BHSÍ og sporhundur Björgunarsveitar Hafnarfjarðar mættu á sama tíma og skipulögðu öll hundateymin sig saman til leitar út frá upplýsingum frá vitnum og lögreglu. Leitað var fram á nótt ásamt öðrum björgunarsveitum. Kristín og hennar hópur fóru til hvíldar um kl. 3:30.

Á sunnudeginum, 30. nóvember, fékk teymið úthlutað verkefni um hádegisbil. Tveir aðstoðarmenn, Einar og Lilja, voru fengnir frá Björgunarsveitinni Sigurgeir og hófst löng ganga (um 3 km) á svæðið um kl. 13:30. Björgunarsveitin Kyndill og Kjölur sendu síðan fjórhjól til að ferja teymin inn á svæðið. Þökkum við þeim kærlega fyrir samstarfið. Um stórt svæði var að ræða og ákvað svæðisstjórn að senda fleiri hunda inn á svæðið. Hörður frá BHSÍ kom með fjórhjólunum niður á svæðið og leitaði samsíða Kristínu. Síðar voru sendir tveir hundar í viðbót, Anna og Valur jafnframt frá BHSÍ, á móti þeim. Leit á svæðinu lauk um kl. 20.

Eftir að hafa gefið svæðisstjórn ítarlega skýrslu um verkefni hundateymanna var haldið til Reykjavíkur til hvíldar. Ekki fóru hundar frá Leitarhundum til leitar á mánudeginum.

Maðurinn er ófundinn þegar þessi frétt er skrifuð.